早兩日就同史友們介紹完香港嘅靈牛，而歷史上亦都有唔少「名牛」值得再同大家介紹，其中一隻就係老子所騎嘅「青牛」喇！

喺道教入面有唔少關於老子嘅傳說，其中一個就係老子倒騎「青牛」西行而去，老子嘅呢次出關歷朝歷代都有唔少記載。喺劉向《列仙傳》入面就有講到「後周德衰，乃乘青牛車去」、清文淵閣《四庫全書》本又有提到「老子西遊，關令尹喜望見有紫氣浮關，而老子果乘青牛而過也。」咁呢度就有兩個問題，就係老子到底點解要騎「青牛」，而第二就係到底點解要向西而去。

對於呢個傳說，坊間其實都有唔少唔同嘅解讀，咁阿史就揀一個比較普遍嘅講法嚟解釋。牛喺百獸之中係同人類關係最為密切，特別係喺古代農耕社會當中，牛就更加係性情溫和、任勞任怨，喺《易傳》當中就被視為係坤卦。至於點解會係「青牛」而唔係其他顏色嘅牛，原來喺古代嘅五行理論入面青色五行屬木，亦都代表東方。於是，一個被稱為「東方聖人」嘅老子，就自東而西倒騎「青牛」出函谷關化胡而去，呢個就係老子騎「青牛」其中一個講法，唔知史友們有冇其他睇法呢？

原圖嚟自網絡