近排其中一個城中熱話就係有兩位富家子弟先係喺網上罵戰，繼而就有甚中一人約起打返場擂台戰，而無諗到嘅係，呢場擂台戰似乎真係有機會成事，唔少港人聽到呢個消息就已經相當期待。提起擂台戰，阿史就即時諗返起五十年代嘅一場「陳吳大戰」。

呢場大戰發生喺1954年，參與擂台戰嘅兩位都係當時嘅一代宗師，分別就係嚟自香港嘅太極拳宗師吳公儀同埋澳門白鶴拳宗師陳克夫。吳公儀曾經係黃埔軍校做過教官，自稱係「自北方走到南方，未逢敵手」。呢番說話亦都成為佢觸怒陳克夫嘅導火線，結果就連續半年港澳報章都互相口誅筆伐，最後兩人就決定嚟返場比武，同埋比武所得嘅收益都會用嚟幫助石硤尾木屋區大火災民，真係一舉兩得。

五十年代嘅科技就冇咁先進，並冇即時嘅直播，而當時香港法例又係唔允許公開比武，所以擂台賽就喺澳門新花園酒店進行，仲有好多規定添。去到比武當日，單單係香港呢邊，就有5,000幾人搭船去澳門睇呢場比賽，仲未計澳門當地嘅觀眾。比賽一開始，吳公儀嘴角首先掛紅，繼而陳克夫鼻中拳血流不止；之後，吳公儀打中陳克夫前臂，而陳克夫又高踢，結果經商議判雙方「不勝不敗不和」，唔知呢次擂台戰結果又會係點呢？

原圖嚟自網絡