上次就同史友們介紹咗加多利山上嘅嘉道理道同埋布力架街，香港仲有唔少命名上好有故事嘅街道，其中一條就係「漆咸道」。

呢條位於九龍區嘅主要道路，以前就係由訊號山一帶連接到紅磡同埋老龍坑，今時今日就已經延長去到土瓜灣，成條路段就分成漆咸道南同埋漆咸道北兩段。關於呢條道路，唔知史友們又知唔知道其實佢以前唔係叫做「漆咸道」，而係叫做「德輔道」呢？

「漆咸道」早喺1888年落成，早年嘅位置就正正係未填海嘅紅磡灣海旁，係一條見到海嘅道路，當時仲係以「德輔道」命名。咁點解後尾又冇啦啦會叫做「漆咸道」呢？原來喺1890年，港島區就有新嘅道路，當時政府就想將果條路紀念進行咗海旁填海計劃嘅第10任香港總督德輔，所以就叫做「德輔道」，於是就轉咗個名。

至於原本嘅呢條道路，直到1903年先至以當時工務司漆咸嘅名命名，但由於當時政府官員英文水平麻麻，將原本嘅中文譯音「漆潭」誤譯咗做「漆咸道」，就令到呢個路名錯有錯著用到今日喇！

原圖嚟自網絡