最近阿史就响網上睇到段短片，話唐末民變領袖黃巢因生得醜而俾皇帝唐僖宗嫌棄，因此無咗個狀元之位。最後佢就加入反唐陣營，仲做埋皇帝。咁呢啲內容係有幾成真又幾成假呢？

响二十四史中嘅《舊唐書》同《新唐書》裡面，就無提及過以上呢啲事。對於黃巢嘅描述，《新唐書》有載「善擊劍騎射，稍通書記」，咁似乎佢武藝係有咁上下造詣，但係就無提過佢有考過科舉同做狀元。而呢個講法就應該係嚟自章回小說當中。例如响《殘唐五代史演義傳》，就有一段相似嘅劇情：

（黃）巢聞長安大開武試，招募英才，即辭父母，竟赴長安，入場試畢，果中武舉狀元。次日朝帝，令孜引至駕前請旨。問：「那個是狀元？」令孜奏曰：「此人是狀元。」僖宗一見黃巢，身長一丈，膀闊三停，面如金紙，眉橫一字，牙排二齒，鼻生三竅，唬得魂不護體，半晌方定。僖宗大怒，將黃巢革退不用。

照咁睇，呢個故事都只係講佢係行動行武者路線，唔係行文人路線。而後人對黃巢攞唔到功名呢個印象，應該係嚟自佢作嘅詩《不第後賦菊詩》，「不弟」就證明佢係去過應考。照咁睇，黃巢本身係有一定文采噃。

原圖：網絡