喺飛鵝山山腳嘅牛池灣有一座喺70年代興建嘅公共屋邨，今時今日就有一個好有詩意嘅名，叫做彩雲邨，但以前呢個地方係叫做牛池灣邨，到底因乜解究會改咗個名呢？阿史今次就同大家講一講啦！

喺50年代開始，香港嘅人口就急速上升，人多自然就有住屋嘅需求，當時政府為咗解決呢個問題，就喺60年代至70年代間，就喺牛池灣一帶興建咗唔少公共屋邨就好似彩虹邨、坪石邨、順利邨等，而彩雲邨亦都係其中一座。彩雲邨原址就係牛池灣鄉，以往就係以種植同埋養牛為主，名乎其實就係一個鄉郊，牛奶公司曾經喺40年代都喺呢個地方設立過牧場，以往路過呢個地方仲可以見到由水泥倒模而成嘅大型牛奶樽。

現時嘅彩雲邨喺1978-1981年間分階段落成，喺規劃嘅初期呢度亦都唔係諗住叫彩雲邨，而係諗住叫做牛池灣邨。咁點解又會轉名呢？原來當時嘅市民都覺得牛池灣邨鄉土味濃，於是就諗到新嘅公共屋邨位於彩虹邨上方，不如就以「虹之上為雲」嘅彩雲命名，所以就叫做彩雲邨喇！

原圖嚟自網絡