跑馬地有個祆教墳場？

關於香港早期重要嘅人物，阿史之前就同史友們介紹過麼地，早幾日亦都講過律敦治，就咁睇呢兩個人物好似唔太有關連，但今次阿史要介紹嘅呢個地方就同佢哋兩個家族都好有關係，呢個地方就係跑馬地祆教墳場。

如果講到墳場嘅導賞團，最常開放嘅就有香港墳場、聖彌額爾墳場，而呢個同樣都係跑馬地嘅祆教墳場就屬於係私營墳場，一般嚟講都唔對外開放。

而睇返呢個墳場嘅歷史祆教墳場，又叫做巴斯墳場、又或者巴士墳場，當中嘅巴士係解做「波斯」，呢個墳場係喺1852年落成啟用，係香港最早期建成嘅墳場。祆教墳場入面一共有194個墳墓，自1877年起就以每年一蚊象徵式租金租借，並且係有999年土地租借期限。叫得做祆教墳場就當然唔係人人都葬得，呢度只係得南亞祆教信徒先至可以下葬，所以麼地、律敦治家族嘅J·H·律敦治、鄧律敦治都係安葬喺呢個地方。