油麻地有座九龍最古老水務設施？

舊年年尾窩仔山蓄水池嘅清拆計劃曝光，一時之間引起唔少港人前往朝聖，亦都勾起唔少市民對香港歷史建築嘅興趣，咁阿史都想同大家繼續介紹呢啲咁有歷史價值嘅建築。早排就介紹咗現存戰前五大戲院之一嘅油麻地戲院，而同樣喺油麻地，其實仲有一座珍貴嘅水務設施。

阿史今次想介紹嘅正正就係呢座優雅嘅紅磚建築喇！呢座正正就係位於上海街345號嘅油麻地抽水站宿舍，現時就被列為一級歷史建築物。油麻地抽水站宿舍建於1895年，至今已經有過百年歷史，係新古典主義風格設計嘅建築物。建成初時就已經係樓高兩層，亦都因為用紅磚建成，就被附近居民直接叫做「紅磚屋」。

雖然係叫做抽水站宿舍，但呢座古蹟最早嘅用途其實係水務署工程師辦公室，亦都係九龍首個水務設施（自來水抽水站）嘅一部分，但去到1906年九龍水塘建成之後，就唔再需要油麻地抽水站抽水，去到1911年抽水站停用。咁空置咗嘅「紅磚屋」有咩用？就係先後改做油麻地郵政局、危險品倉庫，淨潔局、工程師宿舍、油蔴地街坊福利會等等。