話咁快就嚟到正月十五，又係一年一度嘅元宵節，阿史先喺度祝大家元宵節快樂！元宵節大家年年都會過，之但係呢個節日係點樣嚟，又有啲咩習俗？阿史今次就同大家介紹下啦！

元宵節喺農曆新年之後第一個月圓之夜，亦都被視為係春天嘅到來，關於呢個節日嘅起源，一般就有兩個講法：其中一個講法就係關於漢武帝。喺漢武帝年間，有一次佢就久病不癒，於是佢聽從擅長方術嘅謬忌，向太乙神求助，而太乙神（泰一神）就係「天神最尊貴的是泰一，泰一的輔佐是五帝」。冇幾耐，漢武帝就順利好返，自此就開始建設太乙祠壇祭祀，並且會喺正月十五通宵達旦以燈火祭祀，就係咁樣慢慢演變成元宵節。

而另一個講法就係喺東漢年間發生，相傳東漢明帝篤信佛法，佢就聽從曾經去過天竺求佛取經嘅蔡愔講，喺正月十五晚上嘅宮內「燃燈表佛」，而民眾亦都跟隨呢個做法，初步嘅元宵節自此形成。咁當然邊個先係真正起源今時今日就已經講唔清，但隋唐年間，元宵節就真正成形喇！

咁呢一日到底又要做啲咩呢？古時嘅人就會食湯圓應節、屋企門口亦都會掛花燈、猜燈謎、踩高蹺、舞獅舞龍，部分地方仲有迎紫姑、婦女群遊嘅習俗，只係今時今日唔少習俗都已經被簡化晒。

原圖嚟自網絡