跑馬地馬場早喺1846年啟用，由原來嘅一片沼澤開闢作馬場之用，一直以嚟都係唔少香港人娛樂嘅地方。而喺1918年嘅今日，呢個馬場就發生咗一件悲劇，就係史稱嘅「跑馬地馬場大火」。

喺1918年2月26日，呢一日正正就係香港賽馬「週年大賽」嘅第二日，但依然都有唔少馬迷入場睇馬。但正當觀眾睇得開開心心嘅時候，看臺棚架就喺下午三點第五場賽事果陣突然倒塌，壓死壓傷唔少人。倒塌嘅意外發生之後，由於觀眾席附近有唔少熟食檔，倒塌嘅棚架隨即將熟食檔嘅火水爐打散，好快就由一場倒塌意外演變成火災。據《香港馬棚遇難中西士女墓碑記》入面所講，呢次意外就有614人走避不及而傷亡，情況相當慘烈。

事後，由於死傷人數眾多，東華醫院負責脤濟工作，並且同政府商議設立公墓作為安葬罹難死者嘅永遠墳場，呢個亦即係後來嘅「戊午馬棚遇難中西士女公墓」，並且設有馬棚先難友紀念碑作為紀念。

原圖嚟自網絡