尋日阿史就同大家介紹到圓明園正覺寺近排就舉行咗一場照片發布會，其中就展出咗唔少首次面世嘅圓明園遺址舊照，呢啲珍貴嘅相片好多都係由當時世界知名嘅攝影師喺圓明園被英法聯軍焚燬後趕到去拍攝，而當時其中一位更加係嚟自香港嘅攝影師，佢個名叫做賴阿芳。

賴阿芳，又叫做黎芳，出生喺1838年嘅廣東省肇慶府高明縣，長大之後就去到香港發展。佢當年就喺皇后大道開設咗一間香港最早期嘅照相館之一「華芳映相樓」，由1859年起開始經營，去到90年代就傳咗畀佢個仔黎乙真，照相館足足就經營咗82年，認真犀利。

賴阿芳（黎芳）係被譽為「十九世紀最重要中國攝影師」之一，有得呢個稱號，大家都會知道佢嘅作品唔單止係得普通嘅人物肖像，仲有唔同地方嘅風土人情、城市景觀、自然風景，甚至乎「三寸金蓮」、「鴉片館」等都係佢拍攝嘅題材。

賴阿芳嘅作品喺當年就已經好出名，當時喺中國工作嘅蘇格蘭攝影師約翰·湯姆生就喺自己嘅著作《十載遊記──馬六甲海峽、中南半島與中國》入面提起賴阿芳，仲盛讚佢「有好的藝術修養，有高超的藝術鑑賞力」，真係相當高嘅一個評價！

原圖嚟自網絡