繼續同史友們介紹一啲歷史謎題,好耐之前就同大家討論過明朝嘅「天啟大爆炸」,而同樣仲有唔少歷史事件被認為係千古謎案,今次阿史就想介紹下北宋嘅「燭影斧聲」。

呢件歷史事件無正史記載,但就喺唔少史料入面都係記載不一,真相係點史學界一直都存在爭議,阿史就先同大家介紹下件事先。「燭影斧聲」被指發生喺宋開寶九年(公元976年)十月壬午夜,最出名嘅記載就係僧人文瑩嘅《續湘山野錄》,當晚宋太祖趙匡胤大病,急召晉王趙光義入宮議事;亦都有講法係指趙匡胤急召咗第四子趙德芳,但就畀晉王阻止咗。無論係邊個講法,最後入咗宮見趙匡胤嘅,正正就係晉王趙光義。

當晉王趙光義入到宮內,宦官、宮妾都需要去到屏風後面,而趙匡胤就同趙光義「酌酒對飲」。而當時嘅房入面,下人就見到喺燭光之下趙光義試過離開自己個位,期間又聽到太祖趙匡胤拎柱斧戳地,並且大聲講「好為之」,之後佢就好嬲咁樣就咗去解帶就寢,而趙光義亦都留宿禁內。

時間去到第二日,宋太祖趙匡胤就駕崩,「太宗受遺詔於柩前即位」,太祖嘅兩個親生仔都冇辦法繼承王位,後來趙光義流放自己細佬趙廷美至死,逼太祖個仔趙德昭自殺,趙德芳亦都離奇病死;再加上當晚「燭影斧聲」嘅現像太難解釋,世人都有懷疑趙光義謀殺兄長即位,但真相係點,就真係一個千古謎案喇!

原圖嚟自網絡