有「中國巨人」之稱嘅詹世釵

早幾日就同大家介紹到一位傳奇嘅香港攝影師賴阿芳，當年佢嘅作品廣傳海外，就連外國嘅攝影師都大讚佢嘅作品體現出深厚嘅技術同埋中國人文氣息。而喺賴阿芳眾多嘅精彩作品當中，就有一幅同一位「高人」嘅合照值得同大家介紹下！

呢位「高人」正正就係有「中國巨人」之稱嘅詹世釵！詹世釵出生喺1841年，亦即係道光年間出世，早年都喺上海從事過詹氏墨店務工，所以後世亦都有嘅記載指佢係開設墨店，但實際上佢係一個茶葉商人。

咁好地地一個茶葉商人點解冇啦啦又會成為一個當時有一定名氣嘅「中國巨人」呢？原來喺1865年詹世釵從商期間，佢就遇到唔少外國人，其中一位英國人對佢相當有興趣，甚至仲想請佢去英國倫敦出道表演。當時詹世釵據講係答應咗呢件事，而詹世釵本身亦都受到良好嘅教育，精通多國語言，所以亦都好順利隨團去到歐洲各國、美國同埋澳洲出演。由於佢身高達到244cm，就連當時外國人都叫佢做「中國巨人」「Chang the Chinese Giant）。