露明道公園有座「上帝古廟」遺址

以往阿史都同史友們介紹咗香港形形式式嘅古廟，就好似車公廟、天后廟、文武二帝廟等等，但唔知史友們又有冇聽講有座廟叫做「上帝古廟」呢？到底呢個「上帝」又係咪西方宗教嘅神明呢？今次阿史就同大家介紹下啦！

阿史所講嘅呢座古廟，今時今日就已經唔存在，只係得返一個遺址位於九龍露明道公園入面，而原本嘅位置就喺馬頭圍。現時嘅呢座遺址僅存嘅就只有一道石門同埋附有饒宗頤教授撰寫嘅碑記。，而石門之上就有一副對聯「真義著千秋，煌煌氣象；武功超萬古，赫赫聲靈」，唔知史友們睇到呢道，又會唔會估到原本廟宇係供奉邊位神明呢？

係時候開估啦，其實呢座廟宇所供奉嘅就係北帝，咁點解平時成日都見到「北帝廟」，但呢間廟就偏偏叫做「上帝廟」呢？原來傳說呢座廟宇前身係南宋二王宮殿故址，以前旁邊仲有二王殿村，廟宇就叫做「二王廟」，係南宋滅亡後王室後人所建，但喺元朝村民唔敢再叫「二王廟」，將廟宇改名叫做「北帝廟」；但叫叫下又發現「北帝廟」又帶有北方帝皇嘅意思，於是就只好改做「上帝古廟」。