東江—深圳輸水工程完工 東江水正式輸入香港

早排阿史就同大家講到香港制水嘅呢段歷史，亦都有唔少有返咁上下年紀嘅史友都親手經歷過。人口不斷增加，再加上只係依賴山澗水及雨水作為主要水源，就更加令到香港嘅食水不足，喺當年嘅今日，就有一項大規模嘅輸水工程完工，意義重大。

其實早喺上世紀20年代，政府就有打算喺廣東省買入淡水去穩定香港嘅水源，但呢個計劃就要去到1960年代先得到時任國務院總理周恩來批准落實動工。早喺雙方協議達成之前，東深供水工程其中一個重地就係深圳水庫，當地嘅部門工程過程就動用咗接近2萬幾個民工以鋤頭、鐵鍬等工具動工，希望可以喺雨季之前完成主壩土方工程。

雙方最終就喺1960年11月15日達成第一次協議，每年就喺深圳水庫向香港淡水，不過最初供水規模唔大。後來香港喺1962年至1963年出現旱災，為咗解決香港食水供應問題，港府就同廣東省當局開始傾長期供水協議，最終1964年4月兩地政府簽訂協定，東江水工程亦都喺1965年3月1日前完工，開始正式輸港。東江水供水，大大紓緩咗香港水資源不足嘅問題。