【焦點new史】邱吉爾親繪二戰風景畫 到底畫成點？

提起邱吉爾，相信史友都會即時諗起佢喺二戰時候點樣帶領英國美國等盟國戰場對抗軸心國，可能仲會有史友知道，邱吉爾曾經以《第二次世界大戰回憶錄》拎過1953年諾貝爾文學獎，真係相當有才華。以為咁樣就完？當然冇咁簡單啦，事關今次阿史就想講一講呢位咁犀利嘅人物，曾經繪畫過嘅一幅畫。

圖入面嘅呢幅畫作係邱吉爾喺二戰期間所創作，題為《庫圖比亞清真寺宣禮塔》（Tower of the Koutoubia Mosque），本身係諗住送畀時任美國總統羅斯福，但後來轉輾之下就成為著名荷里活女星安祖蓮娜祖莉收藏品，而近排呢幅被稱為「邱吉爾最重要的作品」就再次易手，以英鎊830萬高價拍賣出去。

咁呢幅畫到底係想表達啲咩，仲被稱係最重要嘅作品呢？時間去返1943年，當時邱吉爾喺北非摩洛哥召開卡薩布蘭卡會議，同美國、法國商討二戰後期應對軸心國嘅作戰策略，最後就決定將德、意、日打到「無條件投降」為止。而喺會後，邱吉爾就邀請美國前總統羅斯福去到摩洛哥城市馬拉喀什看日落，而呢個景象佢就好深刻咁記住，並且親自揮筆繪畫《庫圖比亞清真寺宣禮塔》，希望送畀對方做生日禮物，而佢本人亦都形容呢幅畫係「比我以往的任何作品都更勝一籌」，真係好有意義啊！

原圖嚟自網絡