冇幾耐之前,阿史就同大家介紹過中國近代史上第一條商辦鐵路潮汕鐵路,而其實喺五邑地區入面,亦都係第二條商辦鐵路新寧鐵路嘅所在之處,但好遺憾呢條鐵路並無保留到今時今日,反而係因為一件事而自行拆毀咗!

新寧鐵路,又有第二個名叫做寧陽鐵路,曾經嘅位置就係喺新寧同埋新會境內。呢條鐵路當年全長138公里,設有北街站、江門站、會城站等5個站,係由當時旅美華僑陳宜禧主持建造,並喺1908年通車。剛才阿史都提到,呢條鐵路係第二條商辦鐵路,亦即係完全由華人自己集資、施工同埋管理,有相當大嘅歷史意義。

雖然聽落成條鐵路嘅興建好似好順利,但實際上真係難關重重!旅美華僑陳宜禧其實就喺美國從事鐵路工作接近40年先返到中國,當時為咗解決家鄉人口就業問題,就提出咗建築鐵路嘅計劃,並且成立新寧鐵路公司籌備處,由起草、定制線路再去到籌款都一一準備。 喺1904年嘅時候,陳宜禧就先後嚟過香港同埋美國籌款、亦都出售咗自己喺西雅圖嘅資產,去過舊金山以「勉圖公益,振興利權」演講,號召鄉親投資;而另一位鄉紳余灼亦都喺省、港、南洋等地籌到,最後籌得原定計畫嘅四倍款項。

而當以為咁就萬無一失,但點知起鐵路前就畀新寧縣知縣陳益偷換奏摺,將原本「商辦鐵路」變成「縣官倡辦 」,好在最後得到商部署右丞王清穆幫手,最後仲得到,清廷賜予陳宜禧尚方寶劍,新寧鐵路終於獲朝廷認可。

工程分成三期興建,1908年1月6日開始營運,去到1920年代每年收入保持喺120萬元左右,期間雖然經營困難,但都仲可以維持到。之不過,去到1939年日本入侵廣東,呢條鐵路就由國民政府下令拆毀,正式結束佢嘅使命。

原圖嚟自網絡