提起晚清、近代中國嘅重要人物，相信大家都必定會諗起晚清四大名臣。曾國藩、李鴻章、張之洞等阿史都同大家介紹唔少，接下嚟當然就要講埋呢位著名湘軍將領，亦都係四大名臣之一嘅左宗棠。

1812年出生喺湖南嘅左宗棠，6歲嘅時候就攻讀《四書》、《五經》，9歲嘅時候就學識寫八股文，只係去到考試嘅時候屢試不第，功名止於舉人，自此亦都唔再參加科舉。而喺1837年一次機緣巧合，兩江總督陶澍回鄉省親就發掘到左宗棠，招佢進入陶澍幕府，佢亦都先後成為湖南巡撫張亮基、駱秉章等人嘅幕府，仲出名到連咸豐皇帝都識佢，要求佢出手討伐太平天國。

1856年，左宗棠升任兵部郎中，其後幾年就得到曾國藩舉薦先升任浙江巡撫、閩浙總督、一等恪靖伯等，最後仲官至軍機大臣，真係平步青雲。佢一生經歷過討伐太平天國、洋務運動、陝甘回變、新疆之役、中法戰爭等重要中國歷史事件，有功有過。

而去到佢晚年嘅時候，佢就開始大興洋務，喺福建辦船政局、創辦求是堂藝局、甘肅辦紡織廠、督辦新疆軍務、甚至仲喺重整湘軍督辦福建、臺灣海疆防務，亦都喺呢段時間以72歲之齡病逝於福州。後世對佢有唔同嘅評價，但喺為民族存亡同埋中國近代化方面，普遍都認為佢係晚清一位偉大嘅人物。

原圖嚟自網絡