繼續同大家介紹一啲香港嘅特色基建，青馬大橋、青衣大橋、青荃橋都同史友介紹過，咁到底仲有冇其他比較有特色嘅橋可以講呢？咁就當然有啦！今次阿史要介紹嘅，正正就係1998年隨住東涌綫及機場快綫投入服務而啟用、位於藍巴勒海峽上嘅橋，佢有兩個名，既可以叫做藍巴勒海峽橋，又係叫做青荔橋。

咁史友們可能都會有個問題，就係點解呢條橋會有兩個名呢？原因其實相當簡單，其一就係呢條橋實際上就係港鐵嘅一條鐵路橋，由於位置正正就喺藍巴勒海峽之上，所以港鐵就叫呢條橋做藍巴勒海峽橋。而另外一個名青荔橋就係因為呢條橋本身係連接住青衣站及茘景站，咁所以就簡稱做青荔橋喇！

提到呢條橋就當然要介紹下佢嘅特色，亦即係香港唯一嘅雙層鐵路橋樑設計。其實喺港鐵興建機場鐵路果陣，政府仲未決定到底係由地鐵公司定係九廣鐵路去興建西部走廊鐵路，但當時地鐵公司嘅方案就係西部走廊鐵路客運段係可以同機場鐵路整合，令到列車可以直接通往新界西北及香港島，所以當時就有呢個設計喇！

原圖嚟自網絡