新會有位大思想家？

記得响讀預科時，讀思想史個陣去到明代就有兩個熱門主題，一個係理學家王守仁嘅王學，另一個係嶺南學派思想，而嶺南學派就係源於廣東新會，創始人叫陳獻章。

陳獻章係新會人，亦係明代著名書法家、教育家、思想家，人稱白沙先生，為嶺南學派創始人，有「嶺南第一人」、「廣東第一大儒」美譽。年輕時赴京參加會試只中副榜，未能參加殿試，但就入咗國子監就讀，不過之後再應考都係落榜，最後只能返家鄉。27歲個年去咗江西跟吳與弼問學，之後返咗新會，用咗十年時間，悟出「學宗自然」道理。後嚟佢响新會講學十幾年，教咗唔少學生，形成咗嶺南學派，亦係明代理學中其中一個重要流派。

新會出咗呢位大儒思想家，當地人自然對佢敬重有加。而响香港有啲地方都係以佢命名，好似銅鑼灣白沙道，仲有，黃竹坑有間中學，就以陳白沙為校名。