今日係三月八日,係國際婦女節嘅日子,阿史先喺度祝各位女士節日快樂,健康快樂。既然係婦女節,過節就當然要知道呢個節日係點樣嚟啦,所以阿史特別就想同大家介紹一下呢個為咗紀念女權運動而設嘅日子。

要介紹呢個日子,就要由20世紀初開始講起。要知道當時西方多個國家都踏入高速嘅工業化,呢個時候女性都已經係職場嘅一份子,之但係當時打工並冇太多嘅福利,甚至工作條件同埋人工都係好惡劣同低廉。於是為咗令到僱主有所改善,喺1857年3月8日嘅美國紐約街頭,就有製衣紡織女工走上街頭,為現代女權運動開創先河。而喺呢次抗議活動仲促成工會組織成立,未來幾年嘅3月8日都繼續有抗議活動嘅出現。

咁3月8日嘅抗議活動幾時先開始得到廣泛注意呢?答案就係1908年喇!當年嘅抗議就有接近15,000名婦女走上街頭,提出明確嘅要求就好似縮短工時、增加人工、婦女享有選舉權等等,甚至呢次活動仲得到政黨注意,其後發表相關嘅宣言,1909年2月28日就第一次慶祝婦女節。

去到1910年,丹麥哥本哈根召開首屆國際婦女會議,會上就有婦女運動領袖蔡特金倡議設定一天做國際婦女節,呢個提議當然就得到各界積極響應。心水清嘅史友可能會注意到,點解早年嘅婦女節一時又係2月28日,一時又係3月19日嘅?其實當時蔡特金只係提出全世界婦女應該有自己節日,但就冇講明固定嘅日期,所以先有呢個變化,而真正決定呢一日係婦女節,就係因為1917年3月8日俄國嘅「二月革命」。到底個過重係點,留返下次再同大家介紹啦!

原圖嚟自網絡