呢幾日喺就係第十三屆全國人大四次會議,會議上有唔少議題都成為中外焦點,而近排內地媒體上流傳咗一張相片,成為咗另類嘅「焦點」,就係有個戴住用鹿製成嘅狍頭皮帽嘅男人喺會場內認真做筆記,成個畫面相當大反差。

可能史友們同阿史都諗緊同一個問題,就係點解會場內會出現呢種服飾呢,呢度就真係講開有段故喇!喺出席重要場合嘅時候,大家都會著上最嚴肅莊重嘅服飾以表尊重,而呢套服飾都係同一個意思,事關狍頭帽子就係鄂倫春族人嘅傳統服飾。

其實呢類嘅狍頭皮帽都唔係第一次出現喺兩會,喺2013年同樣都係來自內蒙古嘅人大代表,都曾經戴過類似嘅狍頭皮帽趕赴會場。狍頭皮帽對鄂倫春人有住特別嘅意義,作為內地最後一個狩獵民族,佢哋分佈喺內蒙古自治區呼倫貝爾盟鄂倫春自治旗、布特哈旗、莫力達瓦達斡爾族自治旗等區域,大概人口就只係得返8196人。呢個民族以往以狩獵為生,喺打獵果陣都會戴上狍頭皮帽、狍皮衣、狍腿靴;而一到喜慶日子,族入面嘅青年、老年人都會着上呢類服飾慶祝,所以對佢哋嚟講咁樣先至係尊重場合。

原圖嚟自網絡