乾隆有塊寶物玉器 流落海外現身紐約拍賣場

前排阿史就提到有幅邱吉爾親繪嘅二戰風景畫以高價拍賣成功，而類似嘅名人用品唔止得一件，近排喺美國紐約拍賣場，就有一塊流落海外多年嘅乾隆寶物現身，透過呢件寶物大家甚至仲可以了解到當年乾隆、和珅之間嘅君臣關係到底係點。

喺歷史上嘅和珅，形象就係一個權傾一時嘅大貪官，咁到底點解又會深得乾隆寵信呢？呢件寶物可能就畀到個答案大家。呢件寶物其實就係圖入面嘅呢塊青白玉插屏，單純睇玉石嘅材質就已經知道唔係普通貨色，但更重要嘅係在於玉石嘅歷史意義。呢塊長方形嘅青白玉上，一面係刻有臨泉圖浮雕，浮雕上嘅兩個高士佇足松機下嘅山泉邊，意境十足而且人物嘅動態以及樹木嘅形態都可以話係栩栩如生，真係雕工一流。

唔單止咁，喺玉石嘅另一面，就用上陰刻嘅手法刻咗1764年乾隆御製詩《題和闐玉高士臨泉》一首，下款就係寫有「臣和珅敬書」，亦都係呢個大證據，令到後世知道玉石嘅來歷。要知道乾隆愛玉，亦都鍾意吟詩作賦、遊山玩水，而呢塊玉石上嘅乾隆御製詩、臨泉圖、甚至係玉石本身都係乾隆所鍾意，和珅睇落簡單嘅一件禮物，實際就係捉實乾隆嘅喜好，認真犀利。