繼續同史友們介紹每區嘅一啲有特色嘅公共屋邨,早前就同大家講過位於離島、大嶼山嘅鄉村型設計公共屋邨就好似坪洲嘅金坪邨、大澳龍田邨等等,而同樣用到鄉村型設計嘅公共屋邨都仲有幾條,其中一條就係赤柱馬坑邨。

喺赤柱住得耐嘅史友可能都會知道,馬坑邨原址其實係一個寮屋區,而呢個寮屋區喺仲未有太多房屋之前,本來就係山坡同埋溪澗組成嘅自然環境,附近仲有唔少老年樹木,環境都真係幾清幽架!而寮屋區喺1988年就被政府拆卸,咁原本嘅呢啲自然環境又點處理呢?呢個公共屋邨就用咗一個好特別嘅構思。

馬坑邨分成兩期落成,第一期就係1993年入伙,而第二期就係2000年先入伙。由於興建工程會影響到溪澗嘅流向同埋附近嘅樹木,當時房屋署總建築師就建設喺馬坑邨第一期果陣,將溪水伸延,又通過人工將原本嘅溪澗復原,令到馬坑邨同溪澗相互結合。更貼心嘅一點係,其實馬坑邨嘅樓宇喺建造嘅時候都避開晒老年嘅樹木,亦都係因為以上呢啲咁用心嘅設計,所以喺1995年及2000年,馬坑邨呢個設計都分別得到「傑出綠化工程獎」總冠軍兼銀獎。

而有一點唔知史友們有冇留意到,其實馬坑邨同其他離島嘅鄉村型設計嘅公共屋邨唔同,同類設計嘅公共屋邨,就只係得馬坑邨位於市區,房署就表示咁樣係為咗配合周遭環境,真係估佢唔到。

原圖嚟自網絡