世上唔少嘅考古發掘都係由「意外」引發,就好似起啲大型工程發掘地底又或者有探險家巧合經過,但如果阿史話旱災都會令到呢啲「意外」發生,大家又信唔信呢?

近排華南地區就出現旱情,喺旱情比較嚴重嘅廣東河源就連萬綠湖嘅湖水都大幅減少,但咁樣反而令到呢個沉沒喺湖底嘅遺址重見天日。由於湖水嘅消失,粵北文物考古工作隊就可以對本身喺湖底嘅十幾座客家古建築遺址、古窯遺址進行考古發掘。據考古團隊介紹,呢次初步就發現到新石器時代晚期石錛、石箭鏃、削割器;商周時期嘅陶罐、陶片,反映呢個遺址有相當悠久嘅歷史。

呢次發現當然唔止咁簡單啦,湖水下降仲令到十幾座遺址露出水面,經過研究就發現應該係屬於明清時期嘅建築,而附近嘅山頭仲有被火燒過嘅痕跡同埋打磨石器嘅痕跡,呢度4000幾年前好可能係石器加工場、古人類活動遺址,對河源嚟講真係一次重大嘅考古發現。

原圖嚟自網絡