對中國近代史嚟講,孫中山先生係一個相當重要嘅人物,佢既被尊稱為「國父」、亦都被稱為「中國近代民主革命的偉大先行者」。而呢位中國近代嘅革命家,就喺1925年嘅今日逝世,享年58歲。

孫中山出生喺廣東省廣州府香山縣,及後去過檀香山、香港居住成長,之所以會走上革命嘅路,全因幼年聽過唔少關於太平天國嘅事,而喺自己長大嘅過程中,亦都眼見中法戰爭嘅失敗,最終就決心要用革命嘅方式改變當時嘅中國。之後嘅故事大家相信都略有耳聞,孫中山就喺1894年先喺檀香山成立興中會;1905年喺日本東京成立同盟會,期間發動過多場起義,亦都確立早年重要嘅思想「三民主義」學說。去到1911年12月29日,佢就被十七省代表推選為臨時大總統,自此走上佢革命事業嘅高峰。

孫中山先生嘅革命事業一生都係起起伏伏,直到佢離世之前中國嘅政府都仍然動盪。1925年1月1日,孫中山因病喺北京入院,後來證實罹患肝癌末期,病情惡化之下就喺3月12日北京逝世。關於孫中山嘅故事,阿史會繼續同大家詳細介紹。

原圖嚟自網絡