擺花街嘅興盛間接同妓院有關?

繼續同史友們介紹香港一啲特色街道，咁喺中環就有一條連接住荷李活道、威靈頓街嘅街道，名為「擺花道」。就咁聽個名，聰明嘅史友都會知道呢條街道以前必然係同花有關，甚至仲會聯想到以前有唔少花販都會喺呢度開檔。之但係，點解偏偏會喺呢條街呢？阿史今次就同大家介紹下啦！

擺花街，其實仲有另外一個名，叫做倫核士街，英文名就即係「Lyndhurst Terrace」，係為咗紀念一個英國大法官John Singleton Copley而命名。呢條街道大概就喺1840年代就開闢，早年同周邊嘅地方都係唔少妓院、風月場所嘅所在之處，咁又同花有咩關係呢？原來當年嘅男人，特別係去西式嘅風月場所之前，都會有個習慣，就係買花送畀入面嘅女人。唔少賣花嘅商販得知呢個習慣之後，都嚟到呢條街道擺檔，久而久之就被稱為「擺花街」，而呢條街道嘅英文名就維持不變。

踏入1903年，當時港督彌敦命令妓院全數喺石塘咀重置，擺花街就慢慢冇晒賣花嘅商販，取而代之就係珠寶店、顧繡店同埋餐廳出現喇。