一年入面有好多個情人節，上個月就同史友們介紹咗西方嘅情人節，而今日又嚟到3月14日，正正就係白色情人節嘅日子。相信史友們都知道，白色情人節唔係西方嘅節日，1970年代之前亦都冇白色情人節，咁到底呢個節日係點樣嚟呢？阿史今次就同大家介紹下最主流嘅講法，順便應一應節啦！

喺日本嚟講，2月14日呢一日就係女仔向心儀對象送禮表白嘅日子，而3月14日就係輪到男方送返禮物畀對方，話畀對方知自己嘅心意，而呢個節日嘅起源，其實係同一間甜點製造商有關！

早喺1905年，日本嘅福岡就有一間甜點製造商「石村萬盛堂」，早年就以一種由蛋黃整成嘅傳統糕點「雞卵素麵」起家，之但係每次整呢種甜點都會有個問題，就係淨低好多蛋白。於是石村先生就諗到，不如就引入棉花糖生產技術製成軟心棉花糖「鶴乃子」，就咁成為咗當時相當流行嘅甜品。

時間去到1977年，呢間店鋪第三代傳人接手，為咗再次刺激銷量，佢就諗到不如用「3月14日」呢個日子，描繪成「情人節後向愛人回禮的日子」，藉住呢個理由推銷自己嘅糖果，呢個節日就係咁樣出現。

原圖嚟自網絡