百子里係「前小路後圍坊」？

繼續同大家介紹一啲香港嘅特色街道，小路、小巷、圍坊、相信大家都必定會見過，之但係如果係一個相當隱蔽由小路通過先至去到嘅坊，唔知大家又見過未呢？

阿史今次要介紹嘅正正就係位於中環嘅百子里，佢具體嘅位置就係喺結志街同埋鴨巴甸街交界，由結志街連接到三家里。可能阿史就咁描述完，大家去到現場都未必搵得到，因為佢隱蔽到就好似一座普通大廈嘅入口咁。百子里就係一個坊，而平台上面就因為有座舊樓叫做「百子樓」，所以先至得出百子里呢個名。而呢個地方由此周邊都有政府官家地皮，亦都有唔少唐樓包圍，所以先至形成呢個咁獨特嘅天井地形，十足十就係「前小路後圍坊」嘅格局。

而呢個地方嘅歷史當然唔止咁簡單啦！如果史友們有留意，其實百子里係孫中山史蹟徑其中一個景點，因為呢個地方曾經就係1892年由楊衢雲、謝纘泰所創立嘅輔仁文社原址，唔少師生都曾經喺呢個地方討論當時中國嘅國事，後來香港興中會都係喺度成立，真係估佢唔到！