繼續同史友們介紹一啲香港特色嘅歷史建築,如果同史友們提起「新界六日戰」,大家可能即時諗到嘅地方會係大埔旗桿山又或者吉慶圍,但史友們又知唔知其實元朗屏山都有個地方係對呢場戰役有重大嘅影響呢?阿史今次想介紹嘅正正就係達德公所喇!

達德公所建於清朝咸豐年間,本身就只係一個村落聯盟(達德約)聚會、祭祀及同埋進行露天市集管理處嘅公所,以往就曾經為咗抵禦海盜而駐有更練團,但又點解會同抗英扯上關係呢?時間返到1898年,當年英國通過《展拓香港界址專條》租借新界,但由於居民對前景擔憂,更加唔想被英國租借,所以就喺1899年3月28日,達德約就聚集咗喺公所發動「抗英揭貼」,仲搵埋屏山鄧族、錦田、元朗等等村民幫手募集款項、購買武器,所以當時新界居民抗英嘅指揮中心,正正就係達德公所呢個位置。

「新界六日戰」最後以失敗告終,新界居民死傷慘重。去到1938年,屏山鄧族就決定同達德約相關嘅村落捐款資助重修公所,並且將當年抗英犧牲烈士嘅名,刻到公所正廳石碑,兩旁對聯就寫住「達顯英靈如在望;德成敢勇永留名」。而現時,達德公所唔單止係屏山三大重要文物建築之一,仲已經被列為法定古蹟。

原圖嚟自網絡