重門深鎖逾四十年 「美港貨倉」忽然重開？

如果提起「美港貨倉」呢個名，唔知史友們有冇印象，但成日喺荃灣出入嘅居民都一定會知道呢座紅磚建築！呢座建築物唔單止靚，仲有另外一個特點，就係喺過去接近四十年座落喺荃灣黃金地段嘅美港貨倉基本上都冇乜業務，亦都冇乜人車出入，但就有街坊近排有新發現！

有街坊就發現呢條歷史悠久嘅建築近排有重型車輛出入，仲有幾個工人開始工作，呢個舉動引起附近市民熱議，唔少居民都擔心呢座建築物會有不測。據資料記載，美港貨倉係屬於商人蔡聲白，呢位人物出生喺1894年嘅浙江，學歷高到係完成美國麻省理工嘅課程。後來佢返到中國之後，就同當時上海絲綢大王莫觴清個女兒結婚，仲接手埋上海美亞織綢廠。踏入40年代因為戰亂同政局不穩，佢就移居到香港，成立美亞織綢廠，就係現址嘅美港貨倉。

美港貨倉隨住蔡聲白離世後，由1977年一直空置至今，就算周圍嘅建築都變晒高樓大廈，美港貨倉都保留原貌，所以對當區居民嚟講，呢個地方真係有特殊嘅意義同價值。