時隔35年 三星堆文物再出土！

以往阿史都同大家介紹過充滿神秘感、甚至被稱為「外星人文明」嘅三星堆遺址，而距離35年前嘅大發現之後，近排成都就召開咗「考古中國」重大項目工作進展會，會上就公佈咗三星堆新發現嘅6座「祭祀坑」以及當五百幾件文物，到底有咩新出土嘅文物？阿史就同大家介紹下啦！

四川廣漢三星堆遺址其實就早喺上世紀嘅20年代被發掘，只係經過1934年首次發掘之後，相關嘅考古工作就再冇乜重大進展，直到35年前四川省文物部門重新啟動三星堆遺址考古工作，先至發現到當時震驚考古學界嘅青銅人像、青銅神樹、金杖等珍貴文物，並且推斷呢個遺址有可能係夏代晚期至商周時期。

而喺2019年至2020年，考古團隊又再次有新發現，佢哋發現6座三星堆文化器物坑，入面就發現有金面具殘片、鳥型金飾片、巨青銅面具、青銅神樹、象牙合共五百幾件文物，當中黃金面具就算冇任何支撐都可以獨自豎立，含金量仲達到84%，據推測完整嘅面具可能仲達到500g，比商代最重嘅金器仲要重。而呢次仲發現未來「國寶級文物」，就係一座頂尊跪坐人頭像，上面飾有四條飛龍，形象生動，反映當時鑄造嘅技術相當高超。