早幾日阿史就同史友們講起《時局圖》，亦都有解釋過點解當時喺中國冇佔領地嘅美國都會以「飛來鷹」嘅形象出現喺時局圖入面。而當時喺中國得唔到任何好處嘅美國，喺《時局圖》當中其實就係立足喺今日菲律賓嘅位置，到底呢度又有咩故事可以講呢？阿史今次就同大家介紹下啦！

要知道西班牙其實係真正世界上第一批殖民帝國，曾經亦都係歷史上最大嘅帝國之一，甚至仲犀利過英國，咁佢點解會喺呢班戰爭失去長達400年殖民帝國地位呢？其實早喺1895年，西班牙統治之下，古巴同菲律賓都發生革命，希望可以推倒殘虐西班牙統治，但軍方就進行殘暴嘅鎮壓，甚至仲有唔少美國僑民受到波及，一直都想插手加勒比海嘅美國政府就睇准機會，一度派出軍艦緬因號去到古巴，但後來就被炸毀。

時間再去到1898年，美國就派出公使希望西班牙可以喺古巴停火，西班牙亦都一度休戰，但冇幾耐美國國會就發出決議指佢哋支持古巴獨立並且封鎖古巴港口，呢個舉動就令到西班牙向美國宣戰，喺古巴、波多黎各、呂宋(即係今日嘅菲律賓)同時爆發戰爭。美國就打住「幫助古巴獨立」嘅旗號喺多條戰線強行登陸，節節獲勝成功攻陷古巴。西班牙失去太平洋制海權之後，菲律賓亦都隨時發動革命，美國亦都順勢消滅咗西班牙艦隊。

西班牙戰敗之後，就同美國簽訂《巴黎和約》，完全放棄古巴，割讓波多黎各、關島等原殖民地畀美國，菲律賓就以2000萬美元賣埋畀美國，西班牙長達400年殖民帝國地位因此消失。

原圖嚟自網絡