如果史友們接觸過內地朋友,可能都會聽過佢哋有時用「美帝」嚟形容美國。好似最近就有唔少內地網民話「中國人不吃美帝這一套」。美國係聯邦制國家,又無皇帝,咁點解會叫「美帝」呢?

呢個「帝」唔係指皇帝,而係帝國主義。以前讀過世史嘅史友都應該會知道,帝國主義係資本主義發展嘅最高最後階段,依靠資本輸出,要其他國家為佢哋勞動,令佢哋本國得利。簡單而言就係一種政治同經濟嘅壟斷同剝削,當中就有住霸權嘅意思。

响新中國成立後,冷戰令世界出現兩大陣營,一邊係以蘇聯為首嘅社會主義國家陣營,一邊係以歐美西方國家為首嘅資本主義國家陣營。基於意識形態關係,响上世紀五六十年代中國就以「美帝」嚟諷刺美國係帝國主義國家。後嚟中國同蘇聯交惡,又以「修正主義」嚟形容蘇聯,簡稱「蘇修」。所以,「美帝」成為中國民眾用嚟諷刺美國霸道嘅貶義詞喇!

原圖:網絡