仰韶遺址係中國現代考古學起點？

以往阿史都同史友們介紹唔少中國近代嘅考古遺址，相比起以往單純嘅發掘，考古學其實係一項比較有系統，以器物、建築、生物遺留等唔同方面入手，以科學同人文學嘅角度還原人類嘅歷史，咁到底中國嘅考古學又係幾時開始呢？普遍學界認為就係仰韶遺址喇！

呢個位於黃河中游地區嘅新石器時代中期考古學文化，大概所屬嘅年代就係公元前5000年－公元前3000年前，分佈嘅地區就係今日嘅甘肅省到河南省，咁到底點解呢個地方會被稱為係中國考古學嘅起點呢？要知道早年其實有唔少外國嘅探險家都好鍾意去到中國周圍考察，當時瑞典地質學者安特生亦都唔例外，佢先後就喺1918年同埋1921年到過仰韶遺址嘅範圍進行考察，並且喺1921年4月認定當地係有大規模新石器時代人類遺存。

於是，佢喺同年嘅10月至12月，就聯同中國地質學家袁復禮等人喺當地進行有系統嘅考古發掘，出土咗大量嘅陶器、骨器、石製工具等等。由於呢個係第一個鴞中國發現嘅新石器時代文化遺存，並且係用上有系統嘅方式發掘，所以就被視為係中國現代考古學嘅起點喇！