近日國內就因為瑞典企業H&M一份停用新疆棉花嘅舊聲明就引起一輪熱議，甚至唔少內地民眾相當憤怒，而呢件事仲有好多間外資企業都有份。咁外交部發言人華春瑩尋日就直頭出嚟回應，駁斥美國等嘅西方國家對新疆嘅指責都係建基於謊言，而美國更加冇資格同中國講「強迫勞動」。到底呢個說話當中有來玄機？阿史今日就同大家講一講啦！

喺歷史上，「強迫勞動」採摘棉花最犀利嘅國家，唔知史友們諗唔諗到係邊個呢？心水清嘅史友應該都知呢個國家正正就係美國喇！喺17世紀殖民時期，美國就積極開發棉花園，喺1831年至1870年間，美國棉花佔出口總額一半以上，甚至去到19世紀仲已經成為咗全球棉花市場主要供應者。

而喺呢啲咁龐大嘅數字背後，原來係有一段血腥嘅黑歷史。喺Sven Beckert嘅《棉花帝國》入面就有提到，單係1783年到1808年間，美國就總共買咗17萬黑人奴隸從事棉花種植園，而去到1830年，呢啲棉花種植園人口達到過百萬，大部分都係黑人奴隸。隨住「棉花致富」呢件事喺美國傳開去之後，唔少白人農民甚至仲借貸購買機器同埋黑奴，令到呢個情況更加嚴重，唔少黑奴當時都被逼每日採集接近300磅以上嘅棉花、天未光就被催促去勞動，如果採集量唔達標仲會被奴隸主酷刑伺候；如果諗住走佬，奴隸主仲可以通過《逃奴追緝法》（Fugitive Slave Act）捉返你返嚟，總之當時嘅黑奴就已經無晒人權，仲被視為係「財產」，真係血淋淋啊！

原圖嚟自網絡