新疆棉花風波愈鬧愈大,好多著名運動大牌子都成日內地民眾聲討同杯葛嘅目標。有趣嘅係,好多中國知名運動牌子就因為呢次事件而股價大漲,其中一隻股就係李寧牌。

李寧牌可以話係中國最出名嘅運動服裝牌子,亦可以話係改革開放歷程中其中一個成功典範企業。李寧係中國八十年代家傳戶曉嘅傳奇人物,有體操王子美譽。佢退役之後,健力寶創辦人李經緯盛邀同佢交情甚深嘅李寧加入健力寶,成為公司嘅總經理特別助理。一方面李經緯借李寧嘅名氣提升健力寶知名度,另外佢又以健力寶嘅資金實力幫助李寧建立自己嘅運動品牌,响1990年以李寧自己個名命名嘅李寧牌就正式誕生。

不過,當年真正掌控李寧牌嘅係健力寶運動服裝公司,而唔係李寧本人,直到1994年李寧牌先脫離健力寶,成為獨立企業。當時李寧牌响內地已經係知名牌子,之後通過境外上市、贊助中國國家隊同國內各項大型比賽,令呢個牌子成為運動界嘅民族品牌。

原圖:網絡