早兩日阿史就同大家介紹到新疆喺西漢時期就開始有棉花出現，而真正大規模咁開始種植就係喺上世紀五十年代開始，依家新疆年棉產量佔全國八成以上，呢個數字真係犀利。而新疆之所以可以有呢樣成說，其中一個原因就係有京津滬棉紡工廠入到新疆設廠，到底點解呢啲廠房會咁做呢？阿史就同大家介紹下啦！

其實按照新疆當地嘅考古發現同埋文獻記載，呢個地方喺公元1世紀至3世紀之間就已經有用棉布，而喺6世紀就開始有種植棉花，甚至仲會用嚟進行貿易，但規模始終都唔大。而去到1910年代，新疆就開始注重棉業發展，特別係去到盛世才主政年間，就更加積極鼓勵全省棉花增產，並喺棉種、耕作技術、機械上給予支持。咁京津滬棉紡工廠又係點解會入到新疆咁遠呢？原來喺新中國成立之後，當時中國工業產值只佔國民經濟30％，當中仲有超過七成都位於沿海地區，當時毛澤東就表示應該要「好好利用和發展沿海的工業老底子，可以使我們更有力量來發展和支持內地工業」。

眼見新疆原產大量優質棉花，於是當時喺上海就招聘借調技術工人320名，先喺1952年建成烏魯木齊水磨溝「七一棉紡織廠」；後來1958年，天津四個棉雜生產合作社職工300多人遷往新疆石河子，成立「農八師八一棉織廠」，即係後來嘅石河子織染廠；1960年，上海市匯新、匯建、匯成、匯羣織布廠161名職工、連同家屬600人先後遷入阿克蘇，成立「農一師勝利棉織廠」等等，有咗呢批有工業經驗嘅技術員工入到新疆，棉紡工業就係咁樣得到驚人嘅進展。

原圖嚟自網絡