近排因為西方外資企業「拒用新疆棉花」聲明而引發起內地民眾嘅怒火,不少民眾都自發杯葛呢啲企業嘅產品,早兩日阿史就同大家介紹咗中國近代第一次嘅抵制日貨行動,今次就想同大家講一講五四運動另一次杯葛日貨嘅事件。

喺1919年果陣,作為戰勝國之一嘅中國就因為冇法收返山東權益而喺國內引起喺五四運動,呢個時期有唔少新思想傳播,亦都有唔少高等教育學校有進一步嘅發展,而當時民間亦都有一項好大嘅改變,就係發起「杯葛日貨」。

當時中國嘅學生同埋知識份子就提出咗「杯葛日貨」嘅號召,甚至清華大學師生仲焚燒日貨抗議,結果就好快得到工商界以及民間嘅支持,唔少地方嘅商會甚至決定「與日本斷絕工商關係」,而民間就自發罷買日貨,工人仲拒絕到日資工廠返工。喺1920年代之前,其實日貨喺中國周圍都係,中國人對於日貨亦都有好大嘅消費量,但就因為呢次運動令到呢班國民全部轉買國貨,日本對華貿易至少減少咗四成。呢場活動並冇喺短期內中斷,直到抗日戰爭爆發前,民間都仲有多次嘅抗日運動爆發。

原圖嚟自網絡