香港現存最古老當鋪——晉源押

繼續同史友們介紹一啲香港嘅歷史建築，早幾日就同大家介紹到香港現存唯一嘅清代客棧同益棧，咁就有史友留言想阿史介紹多啲同類嘅建築物，咁就當然冇問題啦，所以阿史今次就想介紹香港現存最古老當鋪，即係喺元朗舊墟長盛街嘅晉源押。

喺介紹晉源押之前，阿史就想問下，唔知史友們又有冇喺香港歷史博物館入面見過一塊蝙蝠金錢葫蘆形招牌呢？如果有就岩喇，事關香港歷史博物館入面塊牌正正就係仿照晉源押原本嘅一塊仿製。呢座香港現存最古老當鋪，佢嘅歷史早喺香港開埠之前就已經開始。晉源押係由已故元朗鄉紳鄧佩瓊嘅父親鄧廉明創立，至今就已經有二百幾年歷史，直到二戰結束後，呢間當鋪都有正常運作。

晉源押門前原本係懸掛呈「蝙蝠在上，金錢在下」形狀嘅牌匾，寓意「福在眼前」，而建築整體就係以青磚麻石建成，加上「熨攏」式大門同埋鐵窗，完全就係標準嘅當鋪。儘管後來當鋪冇再經營，但原業主都不少打開晉源押畀人入去參觀，但據講附近街坊近年原業主因為健康緣故，晉源押就已經重門深鎖喇。