繼續同史友們介紹一啲香港嘅街道故事，相信雪廠街大家都聽過去過，甚至有史友都可能知道呢條街嘅得名係同以前有一座儲存冰塊嘅冷藏庫有關，之但係史友們又知唔知道呢啲「雪」喺邊度嚟呢？阿史今次就同大家介紹下啦！

雪廠街其實就係位於中環近藝穗會雲咸街至干諾道中一帶，以往之所以叫做「雪廠街」係因為呢度喺1845年嘅時候曾經有一座冷藏庫專門用嚟儲存冰塊。之但係，呢啲冰塊並唔係喺香港製造，反而係喺另一啲地方運過嚟，唔知史友們又估唔估到呢？

係時候開估喇！答案就係美國。當年香港用到嘅冰，其實就係趁住美國冬季湖泊同埋河流結冰果陣而提取當地嘅冰塊，再通過船運嚟到香港。而為咗防止冰塊融化，喺入到雪廠前冰塊表面都會塗上鋸屑同埋糠皮。咁到底運啲冰嚟香港做乜呢？原來除咗商業用途之外，由於當時雪廠嘅地皮係政府免費批出，所以呢啲冰仲要畀埋公立醫院使用。

全盛時期呢間雪廠一日係可以消耗到七百磅冰，美國冰亦都一度佔據香港市場，只係去到1880年之後，香港自製嘅冰價格開始穩定，美國冰再都無利可圖，雪廠街冷藏庫亦都冇再做落去喇！

原圖嚟自網絡