【講開有段故】美軍轟炸中國駐南聯盟使館 事後聲稱係誤炸?

早幾日就同史友們提到1999年北約轟炸南斯拉夫,當時投下嘅15噸貧鈾彈藥禍害至今,時至今日唔單止係塞爾維亞共和國總統武契奇強烈譴責北約國家,就連我國外交部嘅發言人都表示北約同樣「欠著中國人民的血債」。咁就有史友留言問,到底呢件事同中國有咩關係,阿史就要同大家介紹下啦!

要解釋呢件事,就要由中國同塞爾維亞嘅關係講起。喺1990年代初,南斯拉夫解體當中六個加盟國有四個宣佈獨立,剩低塞爾維亞同黑山兩國,佢哋喺1992年4月重組成立南斯拉夫聯盟共和國,原本中國駐前南斯拉夫大使館就改為駐南聯盟共和國大使館。

而喺1996年果陣,南斯拉夫爆發科索沃戰爭,中國响科索沃問題上係支持塞爾維亞,而當時由美國主導嘅北約就喺1999年介入戰爭,大規模咁轟炸南斯拉夫。而喺1999年嘅5月9日,美國嘅B-2轟炸機發射咗5枚飛彈,「準確」地擊中塞爾維亞貝爾格萊德嘅中國駐南斯拉夫使館,造成三人死亡,十幾人受傷。

事後世界各國都譴責北約同美國嘅行為,時任美國總統克林頓為此事件向時任國家領導人江澤民道歉。咁美國又係點樣解釋呢件事呢?佢哋就表示成件事係誤炸,原因係當時用咗一份過時嘅地圖,但對於呢個解釋中外媒體都唔接受,世界各地甚至仲牽起華人反美潮。

原圖嚟自網絡