上次介紹咗昔日紅磡有間青洲英坭廠，仲講過間廠青洲呢個名係同中國某處係有關係。咁係邊個地方呢？就係澳門喇！

青洲係澳門內港裡面一個小島，昔日居住澳門嘅葡萄牙人稱呢個地方為「綠色島嶼」，後嚟當地華人就譯咗個名叫呢度做青洲。响1886年，葡萄牙人就租咗青洲俾英國人興建水泥廠，間廠仲以呢個島命名，青洲水泥廠就係咁出現咗喇！其實呢間水泥廠最初係由華商余瑞雲响1882至1883年倡辦，但因為資金不足所以就响1886年交俾旗昌洋行接辦。

青洲水泥廠亦係中國境內首間水泥工廠，出產嘅水泥品質優良，甚至滿清官員因此派人嚟了解製水泥技術。不過後嚟因為政治問題，原材料入口澳門受到限制，1912年被迫停工，但又响1915年復工。到咗上世紀三十年代中，因為水泥出口不斷下滑，最終呢間水泥廠响1936年關閉。

原圖：網絡