古洞大石磨有個英軍石砌軍徽

【區區有故講】古洞大石磨有個英軍石砌軍徽

繼續同史友們介紹一啲香港嘅歷史建築，早幾日就同大家講到香港公園嘅前身其實就係域多利兵房嘅其中一個部分，而講開呢啲軍事設施，阿史就諗起近排因為一場山火而重見天日嘅一樣軍事設施。

阿史所講嘅正正就係上水大石磨英軍石砌軍徽，呢個軍徽原本只係喺雜草堆入面，但就係咁樣重見天日。如果有行過路過嘅史友，可能都會留意到石砌軍徽寫有「2ND BATT」同埋「SCOTS GUARDS」。呢個軍徽係由蘇格蘭近衞隊第二營1927年所製，以往附近仲有軍事兵房及哨崗，可以睇到深圳羅湖一帶。睇返啲舊相，石砌軍徽兩排文字中間其實仲有一個薊花軍徽圖案，當年就係用油咗白色漆油嘅石頭所砌成，離遠睇都真係幾壯觀。