最近新疆棉風波發生後，新疆就成為唔少人嘅焦點，雖然香港人無得去個度旅行，但最近就好多新疆嘅相同短片。講到新疆，唔少人都會諗起清乾隆皇帝有個叫香妃嘅妃子，新疆喀什仲有一個香妃墓。不過，呢個香妃墓其實充滿咗誤解。

首先係香妃呢位歷史人物，响唔少文學作品當中，話香妃係被迫入宮，但最後鬱鬱而終。而响歷史上，乾隆帝無一位叫香妃嘅妃子，而响佢後宮唯一嘅回部妃嬪叫做容妃。後世人相信容妃就係香妃嘅原型。

據《清史稿‧后妃傳》所載：「容妃為和卓氏，回部台吉和札賚女。初入宮，號貴人。累進為妃。」呢位和卓氏係新疆和卓家族成員，响伊犁長大。清軍平亂大小和卓叛亂，和卓氏家族因平亂有功，一家被召進京，和卓氏就咁去咗北京，仲入埋宮中。初入宮時為貴人，後奉崇慶皇太后懿旨，和卓氏從貴人晉封為容嬪，其後再奉崇慶皇太后懿旨，晉封為容妃。

响好多文學作品當中，都寫香妃响宮中過得好慘。不過歷史上嘅容妃就完全唔係咁。呢位容妃深得乾隆恩寵，好似乾隆下江南時，容妃就有份伴駕。而容妃由於係回民關係，所以响宮中專設回民廚師照顧容妃飲食需要。至於响文學作品中皇太后對香妃睇唔順眼，甚至被太后迫害甚至毒死，歷史上容妃就似乎好彩得多。因為和卓氏號貴人累進為妃，都係奉崇慶皇太后懿旨。而且崇慶皇太后仲早死過容妃，所以歷史上根本就無太后毒死「香妃」一事。

所以話，有時小說故事嘅嘢，唔駛太認真看待。

原圖：網絡