香妃唔响新疆香妃墓？

講到香妃，可能有史友都知道新疆喀什附近有一個香妃墓，後世流傳香妃事蹟係由乾隆帝容妃演變出嚟，咁呢個香妃墓又有幾成真幾成假呢？

呢個香妃墓係當地一個伊斯蘭教聖裔陵墓嘅一部分，傳說香妃响北京紫禁城抑鬱而死，死後乾隆皇帝就派六萬六千六百六十六人送葬隊伍，抬著香妃嘅棺木返回故鄉，運送途中棺木仲唔准落地。當棺木送到喀什時，送葬隊伍只剩下六人。當地人深信，香妃屍體就係咁運咗返新疆呢個故鄉。

不過，傳說歸傳說，香妃事蹟係由乾隆帝容妃演變出嚟，但容妃死後係葬响河北省清東陵裕陵妃園寢。所以，就算當容妃就係香妃，佢嘅遺體都無可能係運咗返新疆。所以，就有一個講法話，香妃墓內存放嘅係香妃嘅衣冠，呢啲遺物係由香妃兄長用咗三年半時間從北京帶返喀什。講到呢度，相信史友們都知成件事到底有幾真實。