今時今日如果要鬧人相貌堂堂但做出品行敗壞嘅事，大家通常都會用到「衣冠禽獸」呢個詞，之但係如果認真去理解同追溯呢個詞，其實原本「衣冠禽獸」嘅意思並唔係用嚟鬧人，而係用嚟讚美人，到底點解?阿史今日就同大家介紹下啦！

喺古代嘅中國，其實衣、冠都係古人身份同埋地位嘅象徵，有啲衣著就算有錢都唔可以著，唔少款式都有嚴格規定，咁朝廷之上皇帝就係以「龍」嘅形象自居，至於朝廷官員嘅衣服上就要繡上各種禽獸，文官身上就會繡上「禽」、武官身上就會繡上「獸」，所以加埋就會有齊「禽獸」。唔同嘅文禽武獸都反映住果位官員身份嘅高低，就以明朝為例，文官袍子身上就係由仙鶴開始、一直由錦雞、孔雀、雲雁、白鷳、鷺鷥、鸂鶒、黃鸝排到鵪鶉；至於武將身上嘅袍就係由獅子(一品和二品)、老虎、豹子、熊、彪(六品和七品)、犀牛排到去海馬。如果古時話人係「衣冠禽獸」，其實就係讚緊人身份地位高尚。

咁由幾時開始呢個詞會變咗做貶義詞呢？原來喺明朝中後期，當時朝廷嘅大權就由宦官掌握，無論係文官定係武官，唔少都驚咗佢哋，甚至仲幫住呢班宦官欺壓百姓，咁去到果個時候百姓就將「衣冠禽獸」變成貶義詞，就真係鬧緊文官武官係「禽獸」喇！

原圖嚟自網絡