近日聯合國人權理事會三個特別報告員就發布咗一封畀美國政府嘅聯合信件,信件當中就清楚指控美國政府同埋美軍都持續咁侵害關島查莫羅土著人嘅人權,就連我國嘅外交部發言人趙立堅都勸美國正視自身人權問題,到底呢件係咩事呢?阿史今次就同大家介紹下啦!

關島係一個位於西太平洋嘅島嶼,喺十六至十八世紀期間,呢個地方係作為西班牙馬尼拉郵船中停站,而島上人口就係以查莫羅人為原住民,足足去可追溯到四千幾年前。而去到美西戰爭期間,美國就喺1898年6月21日佔領關島,將關島用作航行至菲律賓嘅中繼站,後來仲將關島列為非合併建制屬地。

美軍喺佔領咗關島之後,就先喺1899年喺皮蒂建立碼頭、1901年建立海軍軍營,之後嘅幾十年,相繼都有電話、電報站同埋各式各樣嘅軍事設施建立。就咁睇落好似冇乜大問題,但其實呢片土地真正嘅主人正正就係查莫羅民,喺無經過協商之下,美國政府同美軍就將島上三分一嘅領土打造成軍事基地,而且仲不斷擴建緊,嚴重影響土著人嘅經濟生活;喺關島上嘅居民其實係擁有美國國藉,但就只係二等公民,至今都冇擁有美國大選嘅投票權。

講得白啲,對美國嚟講關島亦都只係一個亞太地區嘅軍事前哨站,難怪呢份報告會作出咁樣嘅指控。

原圖嚟自網絡