今年係內地著名大學廈門大學創校100周年，唔知係咪呢個原因，阿史最近同唔少福建籍朋友講起，先發現佢哋祖輩同父輩都係廈大畢業，真係犀利。

廈門大學係由著名愛國華僑領袖陳嘉庚先生於1921年創辦，亦係中國近代教育史上第一所華僑創辦嘅大學。陳嘉庚响福建出世，長大後去咗南洋發展，成為二十世紀初當地最有影響力嘅華人企業家。佢發跡之後，覺得家鄉福建文化教育落後，於是捐款响福建興辦教育，廈門大學就係由佢投資創辦。陳嘉庚為咗廈大，真係可以話係盡心盡力。好似响三十年代因世界經濟蕭條，陳嘉庚生意一落千丈，仲出現財困，當時英國政府同陳嘉庚講，話可以支持佢渡過難關，但就唔想佢再匯錢返福建興學。但陳嘉庚就表明辦企業就係為咗興學為咗國家，為咗廈大可以繼續運作，於是佢就將响新加坡三幢別墅賣咗，撐住廈大。據陳嘉庚個孫所講，陳嘉庚深信中國要變強，必須以教育開始。

原圖：網絡