早兩日阿史就同大家介紹到喺近代中國「掃盲運動」作出重大貢獻，被稱為「當代倉頡」嘅祁建華。咁問題嚟喇，咁古代嘅倉頡又係咩身份，傳說佢又做過咩事呢？阿史今次就同大家介紹下啦！

倉頡傳說嚟講就係黃帝嘅右史官，生有「雙瞳四目」，亦都流傳佢就係漢字嘅創造字。「倉頡造字」嘅傳說早喺戰國時期就已經流傳，喺《韓非子·五蠹》入面就有提到「昔者倉頡之作書也，自環者謂之私，背私謂之公」；而《呂氏春秋·君守篇》都有指出「奚仲作車，倉頡作書，后稷作稼，皋陶作刑，昆吾作陶」。

相傳倉頡原本係作為黃帝史官結繩記事，但後來有感呢種方法滿足唔到需求，於是喺洧水河南岸思考點樣造字，突然就有一隻鳳凰飛嚟嘴入面叼住啲嘢飛嚟，地上又出現野獸蹄印，呢啲現象令到倉頡細心觀察萬物，最後創造出文字。

喺後來《說文解字序》就更加有具體形容倉頡造字果陣，係按照「蓋依類象形，故謂之文；其後形聲相益，即謂之字。文者，物象之本；字者，言孳乳而寖多也。著於竹帛謂之書」，都真係幾講究下。咁有史友可能會問，到底倉頡創造嘅字係點樣呢？據學者推論最有可能就係發展成戰國時期流行嘅篆書。喺記載入面，倉頡造字嘅地方就叫做「鳳凰銜書台」，後人為咗紀念佢，就將河南新鄭縣城南一個地方命名為「鳳凰銜書台」，喺宋朝年間仲建立咗一座「鳳台寺」。

原圖嚟自網絡