上次介紹咗關島响十九世紀佔領關島,列為非合併建制屬地。除咗關島,美國其中一個州份夏威夷,成為美國佔據過程中都唔係好光彩。

夏威夷群島位於太平洋中北部,係波利尼西亞群島一部分。早响十一世紀已經有波利尼西亞人响島上居住,1810年,原住民大酋長卡美哈梅哈一世統一夏威夷群島,建立咗夏威夷王國。當時呢個王國仲得到英國、法國、美國等國家支持,維持其獨立地位。不過,响1875年,美國政府就同夏威夷王國簽署《美夏互惠條約》,武力佔據咗珍珠港。

到咗1893年,响夏威夷嘅美國僑民就响美國海軍陸戰隊支持下,發動咗一場政變,推翻夏威夷王國嘅利利沃卡加尼女王政權,仲响1894年宣布成立夏威夷共和國。1898年美西戰爭後,美國國會以兩院聯合決議形式通過咗夏威夷併入美國嘅決議,同年8月夏威夷正式成為美國領地。直至1959年,夏威夷先正式成為美國第50個州。

响上世紀七十年代開始,夏威夷嘅原住民就組成主權申索團體,要求美國政府就推翻夏威夷王國、吞併夏威夷同長期駐軍作出道歉同賠償,直到1993年時任美國總統克林頓簽署咗「道歉法案」宣佈代表美國人民,就1893年美國政府推翻夏威夷女王嘅政變正式道歉。

原圖:網絡